Mer muss nit alles wesse.

vum Toni Buhz

Der Hein maat e muuzich Jeseech. Jester hatt hä en Wiel en singer Böcher jebläddert un dobei jet jefunge, wat im nit us dem Kopp jon woll.
Mer muss wesse, dat der Hein ne Jeck wor. Keine Verdötschte, nä, der Hein wor jeck op Kölle. Un op all dat wat domet zesammehängk. Wat im en de Fingere feel, dat dät hä sammele. Ov dat ahl Posskaate, ov Kalenderblädder met Belder us dem ahle Kölle wor, hä kunnt et all jebruche. En de Antiquariate wor’e ne jode Kunde un jän jesinn. Mänche Euro hatt hä allt bei inne jeloße un en singem Böcherschaaf stundte Schätzjer, för die in vill Lück beneide däte.

Sing Frau knotterten luuter, wann hä ens widder jet heim braht. Su wie zeletz en janze Kess Böcher. Die hä nem Mann op der Stroß, för nen Appel un en Ei avjeluchs hatt. Räch hatt sing Frau, wann se schannt, dat se kein Plaaz mih för andere Krom hatt.
Beim Bläddere en enem ahle Boch, hatt der Hein dat Woot Klöppelchesmeß jefunge wat hä nit kannt. Us dem Tex vum dem Boch kunnt’e och nix eruskrijje. Sing Frau woß et och nit. Ovends beim Stammdesch kräch hä vun de Fründe op sing Frohch nor domm Antwoode.

No kom der Hein aan et simeleere. Do hatt hä Zick för, weil sing Frau enkaufe wor. Hatt hä nit allt ens jet vun Klöppelcher jehoot, die en Zoot Brütche wore? Klöppelchesjunge kannt hä och. Dat sin Musikante, die op Fastelovend, op Kirmes un beim Schötzefeß met Trömmelcher em Zoch metmascheere. Wann die en eije Meß hatte un spille däte, wor vun däm wat der Pastur sage dät nix mih zo verstonn. Nä, dat kunnt et och nit sin.

De Dör jingk op un sing Frau kom heim. Se hatt beim Bäcker rundjefroch, ävver keiner kunnt ehr helfe wat en Klöppelchesmeß wör. Ein Frau hatt jedaach et jingk öm et Klöppele vun Deckcher. De Bedienung hinger der Thek hatt nor Klöppel verstande un meinte, dat wör secher dat Dinge, wo mer der decke Pitter met lügge dät.

Der Hein hatt jenoch un maat sich durch de Kood. „Ich jonn ens bei de Jroß, un froge die ens“. Bei der hatt hä och kei Jlöck. De Jroß wor jet dauv un verstundt nor Meß. Su moot hä sich dä ahle Wetz aanhüre, dä de Jroß jedes Johr om Namensdach em Juni zom Beste jov: Sät der Tünnes för der Schäl, wie dä met ener Kar Meß kom, „Wat mähs do dann met dem Meß?“ „Dä well ich op de Erbele dunn“, saat der Schäl. „Och“ meinte do der Tünnes. „Mer dunn op de Erbele luuter Zucker un Sahn“.

Om Heimwäch jingk der Hein nom Turisteamp. Dat Mädche hinger der Thek wor nit us Kölle. It hatt bloß jet vun Mess jehoot un saat, et jöv en Düx en Möbelmess, en Fotomess un wä weiß wat söns noch för Messe. Vun su ner Klöppelchesmeß hädden it noch nie jet jehoot.

No wor der Hein jo en der Nöh vum Dom, un wie et sing Jewende wor, jov et ne koote „Jangk eren“. Wie hä do ne Schweizer sohch, dät hä in noh ener Klöppelchesmeß froge. Dä laachte un saht: „Kutt ens met“. Lans der Schmuckmadonna jingk et zo der Dör, wo mer fröher en de Schatzkammer kom. Do blevv hä stonn un zeichte noh bovve. Do hinge nevvenenander Holzstöck die verjold wore. „Do hatt ehr die Klöppele sat hä“. Jede Klöppel bedück ei Johr, wo unsen Erzbischof em Amp ess. För jedes verledde Johr weedt en Dankmess  jehalde. Noh däm Joddesdeens weedt dann ene neue Klöppel dobei jehange. „Un dat ess dann de Klöppelchesmeß“ feel im der Hein en et Woot. „Richtich“, kräch hä zor Antwoot.

Wie dä Hein no Hus kom, trok in sing Frau tirektemang en et Wonnzemmer, un zeichten op ne Bärm Böcher. Do sohch hä en singem Schaaf drei Böcher vum Wrede: >Neuer Kölnischer Sprachschatz< . Dat hä do nit dran jedaach hat! Em zweite Band hatt sing Frau im e Zeddelche erenjelaht. Do kunnt hä lese: >Klöppelchesmeß f.: feierliches Meßamt – alljährlich an dem Tage, an dem der Erzbischof den Thron bestieg und jeweils zur Erinnerung, wird ein Stab an der Domschatzkammer aufgehängt, deren Zahl die Regierungsjahre des Erzbischofs angibt.

Jo, daach der Hein, mer muss nit alles wesse, mer muss nor söke künne wo et steit.