Mer Schinghellije

Otto Jäger

Et letz hatte mer widder Besök, ne ahle Schullfründ un sing Frau wore zom Kaffejekumme. Wann mer vier dann beim jemötlije Deil sin, jitt et luuter ei Thema: uns Schullzick. Op der Klaaf freuen ich mich allt iwich em vörus. Do es de Feuerzangebol nix dojäje.
Ich denken off an ming Schullzick zoröck, un immer kütt mer dann eine vun der Lährer en der Senn. Do zehrt der Minsch bes en et Alder vun, em Jode wie em Schlächte. Dat es ne Vörrot för et janze Levve. Dat kennt ehr jo secher all selvs.
Dismol hatte mer dä Physiklährer zwesche. Jung, wat wor dat en Zoot vun Pauker! Dä hät uns janz schön jetriez. Mer moote, jenau jesaat, de Texte em Boch uswendich lihre. Un wehe mer kunnt dat nit. Vun Physik hatt hä kein Ahnung. Wie mer dat Spetz kräje han? Janz eifach! Mer hatten erusjefunge, dat hä em Stoff immer nor ein Sick em Boch em vörus wor. E paar vun uns Pänz hatte zo Hus em Boch wigger studeet un dann em Ungerreech Froge jestallt. Op die Antwoot moote mer luuter bes zor nöhkste Stund wade. Bis dann hatt hä wiggerjelese. Esu kom et erus.
Dat wor dat eine. Dat andere wor: keine Versök dät fluppe. Allemolde stundt hä dann do wie e Häufje Elend, dät der Kopp schöddele un kunnt sich jar nit erkläre, woröm dä Versök donevve jejange wor. Esu wor et och bei der Elektrizität. Hä hatt allt vör der Stund ene Versök opjebaut, un wor janz stolz op dat, wat hä do jeknuv hatt. Weil mer Fetze jo och ein Sick em Ungerreechsstoff wigger wore, kannte mer der Versök. Der Lährer hatt noch jet verjesse un jingk dröm noch ens koot noh nevvenan. Dat wor uns Schangks in dranzokrijje. Hä hatt uns lang jenoch jepiesack. Dat wollte mer uns nit durch de Lappe jon loße. Einer vun uns Fetze schlech noh vörre, dät die Stecker Plus un Minus vertuusche, un wor flöck widder op singem Plaaz, als wann nix jewäs wör.

Der Pauker kom widder, hatt dat Deil jefunge, wat hä jesok hätt, un dät no der Versök starte. Hä jov Strom op die Anlach, un paftich wor et passeet. Et dät Funke spröhe un knalle. Do wor der Strom fott un mer soße em Düstere. De Secherung wor erus jefloge. Nohdäm ne Schüler e Rollo huhjetrocke hatt, kunnte mer dat verbaserte Jeseech vun dem Lährer sinn. Hä soch rack us wie de Nud Joddes. Mer Öster moote uns et Laache verbieße. Schinghellich leefe mer all noh vörre un däten esu, alswann mer iefrich die Anlach Stöck för Stöck am ungersöke wöre för der Fähler zo finge. Op eimol reef unse kleine Fachmann, dem si Vatter Elektriker wor: „Ich han der Fähler jefunge!“ Hä dät uns all verklöre, woröm der Versök nit klappe kunnt.

Die Stecker wöre verkeht anjeschlosse un et wör jo klor, dat dat ne Koote jevve mööt. Ich jläuv, unse Lährer wör et Leevs en der Äd versunke. Dat hatt jesesse! Vun der nöhkste Stund an sollt unse kleine Fachmann de Versöke met opbaue. Der Lährer meinte, vier Auge söche mih wie zwei.