Wä sök, dä fingk

vum Katharina Petzoldt

„Häss de nit minge Brell jesinn, ich ben dä allt en halv Stund am söke?“ „Dä häss de doch om Kopp!“ „Jot, dat mer drüvver jesproche hann.“ -  „Ich söke minge Huusschlössel, ich well enkaufe jonn. Kanns de mer ens beim Söke helfe?“ „Et ess immer et selve met Deer, kanns de nit op Ding Saache oppasse?“ „Do häss et jrad nüdich, wä hät dann luuter et Potemanee odder de Breeftäsch verbrasselt?“

Wä kennt dat nit? - All die Lück, die Odenung halde, kennen dat nit. Ävver die sin eifach nor ze fuul för ze söke. 
Och meer jeit et off esu, un ich ben met mingem Huusjeis, dä mer immer alles verstich. am schänge. Mänchesmol ess mer die iwije Sökerei och ze vill un ich nemme mer vör, en Zokunf ööntlijer ze sin. Dat jeit och en Zicklang jot, ävver dann….

Do fahren ich för e Beispill en e jroß Parkhuus, jonn enkaufe un merke mer nit, wo ich ming Kess avjestallt hann. Ich kumme vum Enkaufe un dä - mi Auto ess fott! Ich hatt dat doch jenau he jepark, odder wor et doch op der nöhkste Etaasch? Die sinn jo all ejal us. Leeve hellije Antonius, helf mer söke! Ich laufe vun einem Stock op der andere.  Nix!  Lanksam lijje ming Nerve blank.

„Dat ess widder typisch. Kunnts de der dann nit die Nummer vun der Etaasch merke un och jenau, wo do die Blechkess stonnjeloßen häss?“, ben ich ens widder met mer selvs am schänge. - Jetz weiß ich et, et wor om drette Parkdeck. Ävver, -  do ess’e och nit ze finge! Wat jetz? Mer hann se der Wage jekläut. Anders kann dat jar nit sin! Ich muss de Poliziei holle!

Drei Pooschte kumme, finge ehr Auto tireck un welle fottfahre. Ich froge maneerlich, ov einer e Händy bei sich hätt, ich mööt de Polizei aanrofe, mer hätten se mi Auto jekläut. „Ich hann mich allt kapott jesook, ävver ich kann et nirjens finge.“ Die drei jriemele.  „Wie süht et dann us?“, wäden ich jefrohch.  Ich nenne der Typ, de Färv un et Kennzeiche. Die Junge deilen sich op un fangen et Söke aan, jeder op nem andere Parkdeck. Op eimol bröllt einer: „Ich hann en jefunge, he dä, dat mööt´e sin!“ Verhaftich, do stundt´e!-- Jo, wie kütt dä dann do hin?

Wat wor ich denne Drei dankbar! „He hadder jeder ne Fünf- Euro-Sching, joht Üch dovun Zijarette kaufe“. „Mer rauchen alle drei nit, un tschüss.“ Fott woren se.

Et soll noch ens einer jet üvver de Jugend vun hück sage! Ich ävver nemme mer vör, mich ze bessere, bes zom nöhkste Mol, wann ich ens widder met minge Jedanke üvverall bin, nor nit do, wo ich eijentlich sin sollt.