Tipp 4

Verkleinerung, die dreite

Wie? Immer noch de Verkleinerunge?, weed sich der ein odder andere vun üch froge. Kein Angs, mer hann et bal. Wie hatte mer de letzte Tipps opjehoot? Ach jo: Jetz blieve bloß noch e paar Laute üvverich, nämlich die, die e ‚je‘ aan et Engk jesatz krijje. Bei denne stüss mer entweder met de ungere Zäng aan de bovvere Leppe, wie bei däm Laut f, (Leevje, Stüffje, Breefje), odder mer blös de Luff zweschen de jeschlosse Zäng durch wie s, x, z (Blösje, Nixje, Krützje). All die krijje, wie jesaat, e ‚je‘ aan et Engk. Wann ehr no der ein odder andere Bochstav vermeese doot, dann litt dat dodraan, dat Bochstave en der Sprochlihr bloß do sin, för do ene Laut met op et Papeer ze mole. Un die, die he fähle, wäden beim Spreche am Wootsengk zo dä Laute, die mer allt kenne.

Domet mer die Kess no zomaache künne, un et all sing Odenung hät, fählt uns noch ene Tipp för dä Fall, dat e Woot met enem Vokal, alsu Selvslaut ophööt. Dä Tipp ess der beste: Dat jitt et nit! Versöhkt ens, dem Puma e ‚che‘, ‚je‘ odder ‚elche‘ aanzehänge. Dat jeit nit. En däm Fall weed dat Deil evvens als klein bezeichnet un kann hühkstens ene kleine Puma sin, su wie e klei Püppi. Schön, ne? Do ha’mer en Arbeit winnijer.

Eins ha’mer ävver bei de Verkleinerunge noch nit besproche. Un dat ess am aller-, aller-, allerwichtichste un zejlich och am aller-, aller-, allereifachste: Se hann en der Mehrzahl immer, ohne ein einzije Usnahm e ‚r‘ am Engk. Fing Lück sage jetz Diminutiv Plural weed immer met ‚r‘ jebildt. Alsu: ei Mädche, ävver zwei Mädcher, ei Strüßje, vill Strüßjer. Et heiß alsu ‚Kölsche Mädcher künne bütze‘. Heeß et ‚Kölsche Mädche …‘, dann wör dat bloß eins. Un dat, wo Kölle voll vun Mädcher ess, die dat jot künne! Em Rusemoondachszoch wäden Strüßjer jeschmesse, Strüßje wör bloß eins, un dat wör ärch kniestich. Un wann am Beckendorfer Büdche der Jupp sing Brütche käuf, dann määt dä secher jrad en Diät, weil’e bloß eins käuf. Villeich hann de Bläck Fööß ävver och bloß dat ‚r‘ hinger ‚Brütche‘ verjesse. Alsu, als jestande Kääl käuf der Jupp natörlich sing Brütcher.

Su, jetz sinn ich em Jeis allt ör Jeseechelcher, wann ehr üch dat durch der Kopp jonn loht, un ör Schnüütcher, wann ehr dat schöne Leedche metsingk.

Marita Dohmen