De Trapp

De schönste Trapp vun Kölle
Die es un bliev em Jözenich.
Jetz well ich ens verzälle,
An wat die all erennert mich:

Zoesch erop, nohm jroße Saal
Do klemmp de janze Prominenz.
Un eesch de Uniformierte all:
För die es dat et Schöns!

Vun de Föß bes an der Kopp
Janz ejal wat et och koss
Stief staats jemaht de Trapp erop
Do bovve es allemol jet loß!

De Trapp erav, em Karneval
Do wood jebütz, jeknuutsch,
Jenau wie Anno dozomol
Em Fastelovends Ruusch!

Do wor so manche Zungekuß
Em düster Leech probat
Wood dobei zom Huhjenuß
Evvens ech kölsche Aat!

Dat kölsche Hätz mät do klafumm
Woröm, weiß jeder selvs jenau
Do föhlt sich dann ne kölsche Jung
Als wies ne kleine Bütz-Rabau.

Un ehts dat Treppche op der Bühn
Op de Bredder, die de Welt bedügge!
Dat jeiht mir niemols us däm Senn
Do hös do „dä decke Pitter lügge”!

Flotte Bilder wooten do jemaht
Och vun dä Kölsche Ehrenjard
Besondersch vun däm Vürstandsdanz
Die woodte löstig un och apaat!

Dat spok en mingem Kopp eröm
Vun dä jode, ahle Zigge;
Doch ben ich do nit trorich dröm,
Denn die Zick läuf luuter wigger!

Anjefange em Oktober Anno 2006
fädich jeschrevve em Dezember 2011
em Vertiko widderjefunge Wingmond 2015

                                                 Karl-Josef Lippemeier